Cead tugtha chun tús a chur le caibidlíocht aontachais
An 14 Nollaig 2023 tháinig ceannairí an Aontais ar chomhaontú tús a chur le caibidlíocht aontachais leis an Úcráin agus d’athdhearbhaigh siad a dtiomantas leanúint de thacaíocht láidir a thabhairt don tír agus dá muintir chomh fada agus is gá.
D’iarr ceannairí an Aontais ar Chomhairle an Aontais Eorpaigh an creat idirchaibidlíochta a ghlacadh ach a mbeidh na bearta athchóirithe ábhartha a leagtar amach i moltaí an Choimisiúin ón 8 Samhain 2023 curtha i gcrích ag an Úcráin.
Gach Úcránach atá ag troid ar son todhchaí níos fearr, tá a shúile ar an Eoraip. Agus le chéile, is féidir linn an troid sin a bhuachan. Le chéile, is féidir linn ár nAontas a iomlánú. Le chéile, is féidir linn an Úcráin a thabhairt isteach inár mbaile Eorpach coiteann. Sin aisling laochra agus mhairtírigh na hÚcráine. Agus sin an aisling atá againne freisin. Le cheile, is sinne an Eoraip.
Ag súil le teacht isteach san Aontas Eorpach
Chuir an Úcráin isteach ar bhallraíocht san Aontas ag deireadh mhí Feabhra 2022, cúpla lá tar éis don Rúis fogha iomlán gan chúis gan údar a thabhairt faoin Úcráin. Chuir an Coimisiún i láthair a Thuairim ar an iarratas i mí an Mheithimh 2022, agus bhronn na Ballstáit uile stádas mar iarrthóir ar bhallraíocht san Aontas ar an Úcráin an mhí sin.
San Úcráin, chruthaigh sin dinimic láidir athchóirithe le tacaíocht láidir ó mhuintir na hÚcráine in ainneoin an chogaidh leanúnaigh.
Tá dul chun cinn déanta ag an Úcráin maidir le roinnt snáithe tábhachtacha, ina measc:
athchóiriú ar a córas ceartais
srian a chur le smacht na n-olagarc
an comhrac i gcoinne an sciúrtha airgid
athchóiriú ar na comhlachtaí rialachais bhreithiúnaigh
cearta mionlach náisiúnta a chosaint
Tá sé léirithe ag an tír freisin go bhfuil sé d’acmhainn aici dul chun cinn a dhéanamh maidir le hailíniú le reachtaíocht uile an Aontais, fiú le linn an chogaidh.
Trí chomhluachanna, prionsabail dhaonlathacha agus tiomantas don rathúnas, cuirfidh an Úcráin le dul chun cinn an Aontais Eorpaigh, agus sinn ag treabhadh i dtreo mór-roinn atá níos comhtháite agus idirnasctha.
Céimeanna i dtreo aontachais – bunús láidir le haghaidh comhpháirtíocht chomhchuí
I measc na ngnéithe lárnacha i gconair na hÚcráine i dtreo tuilleadh comhtháthaithe san Aontas in 2022 bhí an Comhaontú Comhlachais idir an tAontas agus an Úcráin, a Limistéar Domhain Cuimsitheach Saorthrádála, atá i bhfeidhm ó 2017, san áireamh, agus cinneadh an Aontais stádas mar iarrthóir ar bhallraíocht san Aontas a bhronnadh ar an Úcráin. Tá sé léirithe ag an Úcráin agus ag a saoránaigh go bhfuil siad tiomanta do luachanna daonlathacha, don fhorbairt eacnamaíoch agus dá naisc leis an Aontas a neartú.
Tá réamhthorthaí na comhpháirtíochta sin le feiceáil cheana féin. Mar shampla, glacann eolaithe agus saoránaigh ón Úcráin páirt i gcláir thábhachtacha de chuid an Aontais maidir le taighde, nuálaíocht agus oideachas tríd na cláir Fís Eorpach agus Erasmus. Le déanaí, tháinig an Úcráin isteach i gclár an Mhargaidh Aonair agus sa tSaoráid um Chónascadh na hEorpa.
In ainneoin chogadh foghach na Rúise agus in ainneoin na gcruatan atá roimh an Úcráin faoi láthair, tá tús curtha ag an Úcráin le turas a mbainfidh idir Úcránaigh agus Eorpaigh tairbhe nach beag as.
Tá naisc stairiúla agus chultúrtha ag an Úcráin leis an Eoraip agus is mian léi tairbhe a bhaint as an gcobhsaíocht pholaitiúil agus eacnamaíoch atá ag na Ballstáit. Is daonlathas lánfheidhme uachtaránachta-parlaiminte atá san Úcráin, agus tá riarachán poiblí dea-fheidhmiúil aici a choinnigh ag imeacht í le linn an chogaidh. Tá sochaí shibhialta ghníomhach ann agus cruthaíodh gur cothrom agus saor atá an córas toghcháin.
Tá céimeanna tábhachtacha glactha ag an Úcráin cheana féin i dtreo geilleagar margaidh feidhmiúil. Tá an méid sin ríthábhachtach, toisc nach mór don Úcráin a bheith in ann comhtháthú i margadh aonair an Aontais. Ó thaobh an Aontais de, tá obair déanta aige cheana féin ar an Úcráin a chomhtháthú a thuilleadh, mar shampla in earnáil an iompair agus in earnáil an fhuinnimh.
Cúnamh ón Aontas Eorpach don Úcráin
Tá cúnamh airgeadais suntasach curtha ar fáil ag an Aontas don Úcráin. Ó chuir an Rúis tús lena cogadh foghach in 2022, rinne an tAontas, a Bhallstáit agus a institiúidí airgeadais €98.5 mbilliún de thacaíocht a shlógadh don Úcráin agus dá muintir.
San áireamh leis sin tá € 49.4 billiún d’athléimneacht fhoriomlán eacnamaíoch, shóisialta agus airgeadais na hÚcráine i bhfoirm cúnaimh macra-airgeadais éigeandála, tacaíochta buiséadaí, cúnaimh éigeandála, freagartha ar ghéarchéimeanna agus cabhrach daonnúla. Ina theannta sin, is ionann bearta cúnaimh mhíleata agus €32 bhilliún. Cuireadh €17 mbilliún ar fáil chun cuidiú leis na Ballstáit freastal ar riachtanais mhuintir na hÚcráine atá ag teitheadh ón gcogadh.
Amlíne
- an 14 Nollaig 2023
Chinn an Chomhairle Eorpach tús a chur le caibidlíocht aontachais leis an Úcráin
- an 8 Samhain 2023
Mhol an Coimisiún don Chomhairle tús a chur le caibidlíocht aontachais leis an Úcráin.
- an 23 Meitheamh 2022
D’aithin an Chomhairle Eorpach an pheirspictíocht Eorpach agus bhronn sé stádas mar iarrthóir ar an Úcráin.
- an 17 Meitheamh 2022
D’eisigh an Coimisiún a thuairim ar an iarratas ar bhallraíocht san Aontas.
- an 28 Feabhra 2022
Chuir an Úcráin isteach ar bhallraíocht san Aontas.